आखिर काबर चर्चा में हवय बिलासपुर के ब्राम्हण सम्मेलन..
![](/wp-content/uploads/2023/09/image_editor_output_image-337524931-1695348430085.jpg)
(शशि कोन्हेर) : ये महीना के 17 तारीख के बिलासपुर म ब्राम्हण समाज के बहुउद्देशीय परिसर के शिलान्यास के कार्यक्रम म पूरा प्रदेश भर के ब्राम्हण परिवार के सदस्य मन छत्तीसगढ़ी ब्राम्हण विकास परिषद के बेनर म जुरियाय रिहीन। सम्मेलन में पूरा समाज के एकजुटता संग अतेक भीड़ जुटिस की खुद प्रदेश के मुखिया भूपेश बघेल ल मंच से केहे ल पडग़े ब्राम्हण समाज के कोनों कार्यक्रम म पहिली बेर अतेक भीड़ देखे हव। अउ ऐखर वजन के अंदाज लगा लव कि हैदराबाद म कांग्रेस कार्यसमिति के बैठक ले छुट्टी ले के बघेल ल आय बर पडि़स। अब बात पते के करबो कि आखिर अइसे का होगे ए सम्मेलन म कि पूरा प्रदेश भर में चर्चा होवत हे..?
कहिईया मन काहय कि रायपुर व बिलासपुर राज के ब्राम्हण मन छितिर बितिर हवय तेखर सेती ज्यादा महत्व नई मिलय। लेकिन माने ल पड़हि दूनो प्रदीप ल, एक प्रदीप शर्मा जउन मुख्यमंत्री के सलाहकार हवय अउ दूसर डाक्टर प्रदीप शुक्ला भरारी वाले जेन ह अभी हाल ही में कांग्रेस म शामिल होइस हे। एखर संग समाज के त्रिदेव नगर निगम रायपुर के सभापति प्रमोद दुबे, योग आयोग के अध्यक्ष ज्ञानेश शर्मा अउ जैव विविधता बोर्ड के अध्यक्ष राकेश चतुर्वेदी सब्बो पांचों झन मिल के तय करिन कि कइसे सम्मेलन ल सफल बनाबो। खाका तैयार करिन,समाज के सबो घटक ल बगैर भेदभाव के नेवता भेजिन, व्यक्तिगत नेवतिन, समाज के बड़े बुजुर्ग अउ प्रतिभा ल सम्मान करेक के तय होइस। फेर काय रिहिस तीजा के ठीक पहिलि दिन जब्बर सम्मेलन होइस। अउ जुरियाय भीड़ ल देख के सब एक दूसर के पीठ थपथपाय लगिन चुनई के बेरा में हमरो समाज के एकता दिख गिस। कोनो काहय प्रदीप के टिकट पक्का तो कोनो काहय प्रमोद के टिकट पक्का..। मंच ले घलो अब्बड़ दिन बाद समाज के मार्गदर्शक रविन्द्र चौबे के दहाड़त हुए भाषण सुने ल मिलिस।
रामगोपाल तिवारी, कन्हैयालाल शर्मा जईसे बिसरे सियान मन ल घलो याद करिन। जब बारी बोले के मुखिया भूपेश बघेल के अइस त उहू ल केहे ल पडग़े अतेक संख्या म महराज अउ महरजनिन मन जुरियाय हे, कहुं नई आतेव तो बहुत बड़ अन्याय हो जतिस. बाते बात म अपन दूसर पारी बर आर्शिवाद घलो मांगत हुए कहि डरिस लोकार्पण बर मोला बुलाय बर झन बिसरहु। सफल आयोजन बर कर्ता-धर्ता मन के पीठ थप थपइस। सम्मेलन ह खतम होगे लेकिन सफल अउ यागगार बन गे, न केवल ब्राम्हण समाज बल्कि दिगर समाज म घलो ऐखर चर्चा होवत हैं। दूनो प्रदीप ल सब बधाई देवत हे, समाज के एकजुटता अइसने आगु बने राहय।
*CNIN से साभार*